Featured Post

ازاى تكتب رواية الجزء الثانى

Wednesday, August 12, 2009

صالون هيروبولس الثقافي




صالون هيروبولس
عبارة عن مجلس ثقافي مستقل



تقرير مصغرعن اول اجتماع لصالون هيروبولس الثقافي الاول بالسويس

بقلم حسام عيد



المكان / كافيه ام كلثوم اخر الكورنيش خلف الاستاد
اليوم / 7/8/2009
الزمان / من الساعه 6,30 الي الساعه 8.30
هدف الاجتماع /
1- التعارف علي مواهب من السويس في كل المجالات
2- نظره مصر للسويس
3- نظره العالم للسويس
4- نظره السينما للسويس
5- كيفيه تنميه السويس ثقافيا

الاجتماع

في تمام الساعه 6.30 م
وبحضور كلا من السيد حسين العشي
رئيس تحرير جريده بالسويس
وريئس منتخب السويس

والاستاذ محمد التهامى
صاحب فكره الصالون

والاستاذ احمد البوصراتى
صاحب جروب كافيه السويس

و 14 عضو
سيتم نزول الصور الاسامى الخاصه بهم قريبا

تم البدء في فاعليات الصالون

وكان اول اعمال الصالون
هي تعرف الاعضاء علي بعض

ثم بدء محمد التهامى بكلمه عن فكره انشاء الصالون واهداف انشائه
ثم قام الاستاذ حسين العشي
بقول كلمه عن السويس
وعن اهميتها جغرافيا
وتاريخيا
وثقافيا
وتناول وجه نظر الاخرون عن السويس
وبدء بالكلام عن تصوير السينما للسويس
وما عرضته عن السويس
واسباب تجاهل السينما للسويس

وبعد ذلك قام الاستاذ احمد البصراطي
بعرض فكره كيفيه تنميه الصالون

ثم قام التهامى بعرض فكره النقاش الجماعي لزياده الترابط بين اعضاء الصالون

وقام كل عضو بعرض فكرته
عن تنميه الصالون
و كيفيه تنيمه السويس
وكيفيه نشرالثقافه عن السويس

وقام البعض بمناقشه فكره ترميم اثار السويس
وقام اخرون بعرض فكره كيفيه نشر تاريخ السويس
لكي يصل الي مصر كلها والعالم

واخرون ناقشو فكره
كتابه كتب ومدونات خاصه عن تاريخ السويس ومستقبلها

وتم النقاش ايضا في فكره استغلال الصالون في نشر مواهب السويس ايآ كان مجالها
( غناء-شعر-تلحين كتابه قصه قصيره و طويله-وفي كل المجالات الاخري )

وفي نهايه النقاش
كان اهم النقاط التي توصلنا اليها
كيفيه تنميه الصالون ونشر المواهب الجديده
و كيفيه الحفاظ علي تاريخ السويس
وكيفيه تثقيف المواطن السويسي عن ماهي السويس وماهو تاريخها
وكيفيه استغلال الصالون كوسيله واطلاله لنشر نور جديد يتكلم عن السويس وتاريخها وماذا ستكون السويس بعد ذلك

وفي نهايه الصالون تم الاتفاق علي ميعاد الصالون القادم
وانه سيكون الصالون اسبوعيا
( الجمعه في الساعه 6.30 م الي الساعه 8.30 م )

وتم الاتفاق علي خطه عمل الاسبوع القادم

وفي نهايه الاجتماع قام احد الاعضاء بتصوير كل من حضر الصالون

وقام السيد حسين العشي بالسلام علي كل من حضر الصالون
وانتهي الصالون في تمام الساعه 8.30


***


تقرير أخر

بقلم أحمد علاء


الساعة 6.30 و كان التجمع عبارة عن 5 أشخاص

و فجأة 3 اشخاص قادمين من بعيد

ألشنتاين و أحمد جابر و احمد جمال

انصمينا للندوة و وسعنا الحلقة

و لم يمض من الوقت الكثير إلى ما تأقلمنا و عرف كل واحد بنفسه

.
.
.

و جاء عصير الليمون باردا

ليزيد من جمال الندوة

و أخذت تتوافد علينا الشباب

واحد تلو الأخر

لحد اما بقينا تقريبا 12


---
انا حاسس إنى بحكى قصة

هههههههه

المهم

كان كل واحد مننا ليه كلمة لازم يتكلم و يقول اللى فى نفسه

إلا أن بصراتى كان فى نفسه حاجات كتير و قطع علينا كلنا

هههههههه

لا مؤاخذة

و اشتد النقاش ما بين مخرجنا الشاب دكتور كريم و استاذنا الصحفى الكبير حسين العشى

مش عارف انا إيه اللى دخلنا فى السينما دلوقتى

و اخذت المناورات تدور حول السويس

و افلام غريبة كدة اول مرة اسمع اسمها

كان نفسى اسمعهم بيقولى ( الرصاصة لاتزال فى جيبى )

بس محدش جاب سيرته

لإن كان ساعتها عملوا حقن للدماء و مفيش أسلحة

^_^
-------
و فى ظل تلك المناقشات كان فى ناس بتيجى و بتمشى

و أحنا قاعدين

ههههههه

^_^
------
اللى كان عاملنا جو جامد بصراحة

الواد بتاع الدى جيه

D.J

كل اما يسخن الكلام

يقوم معلى الصوت اكتر

ههههههههه

لحد اما جينا بنصلى المغرب كان مشغلنا جورج وسوف باين


^_^
-------
كان من اجمد اللقطات

و محمد عبد الجليل بيتكلم فى موضوع العمل و العمالة السويسية

طبعا كان شايل من المدير بتاعه و مشاكل كدة

هههههه

المهم فكان بيقول ايه

تلاقى اواحد سويسى شغال أدام بتاع تلاتة رابعة خمسة

ستة سبعة تمانية

تسعة عشرة

ههههههههه

كفاية يا عم مش حصة رياضة

حبيبى يا محمد

^_^
-------
و جت طبعا فى الأخر كلمة كاتبنا و صاحب الليلة الاستاذ محمد التهامى

و اتكلم عن هيروبولس

بس مكنتش عايز أقاطعه فى وسط الكلام و أألش وأقول

طب تعرف ليه سموها السويس ؟

عشان المراكب بتمشى فيها بسويس بسويس

ههههههه

لا لا

و بالفعل كان عنده الرد الجميل و المعلومات الحلوة اللى بصراحة اول مرة اسمعها

إن السويس لما جم يدخلوها قيل لهم أدخلوها سواسية

او زى ما ذكر استاذ محمد فى كتابه هيروبولس

( على فكرة الألش بردك فن عالى و مش سهل

ومن خلال الصالون ده انا و محمد عبد الجليل بنتكفل بإظهارة و تقديمه لكافة

أنواع الأدب و عرضه على العالم )

^_^
-----------
طب ما تشربوا حاجة يبنى

و الناس مكسوفة

لحد اما سمعوا إنهم معزومين

إنطلقت الطلبات

ههههههههه

لا مؤاخذة يا رجالة

مش عارف مين كان عايز غدا كمان

هههههههه

المهم

إدارة أم كلثوم برضو عملوا معانا اجدع واجب و نزلولنا دور ليمون ساقع

اللى تمنى البعض إنه يكون جوافه

هههههه

أى خدمة يا كريم مظبطك انا اهو

^_^
--------

و بعد كدة جه وقت التصويت

إمتى نتقابل و إزاى و الساعة كامز ؟

كان بصراتى عايز كل اسبوعين

ولكن لم يكن كريم نائما و لا عبد اللاه و لا علاء

حينها جاءت دور الاغلبية فى إنقاذ فكرة إننا نتقابل كل اسبوع مرة

فى مقرنا الموقت فى أم كلثوم

ربنا يرحمها بأة

-------
و اتصورنا شوية صور حلوة

و كان فى سؤال عمال يدور فى دماغى من ساعة ما كريم ذكر جمعية الفجر الجديد

و انا مش قادر اكتم السؤال

جه وقت التصوير و قولتاه محمد

نعم

بالنسبة للفجر الجديد

قالى ايه

قولتله بيأذن على كام كدة ؟

ههههههه

و إدانى الرايأكشن المطلوب

^__^
-------

اجمل حاجة فى اللقاء

إن كان فى روح كدة بالحماسة طالعة من كلام كل واحد فينا

و كانت واضحة جدا فى انها متشاركة فى الهدف

وكان كل واحد مؤمن بالفكرة وإنها لازم تستمر و تتطبق

و ده شىء مطلوب

-------
-------

طبعا عايزين كل واحد يشاركنا برأى

بفكرة بتجربة بعمل بموهبه بمساعدة

عايزين الفكرة تستمر و تكبر

متخذين ساقية الصاوى مثل أعلى لينا

فى إنجازتها و تقدمها

و كمية المواهب اللى بترعاها


هنعمل شغل حلو فى رمضان

و أعمال جماعية

عايزين حضورك معانا عشان نجهز و نحضر


و فى النهاية طبعا تولى الأستاذ حسين العشى بنشر ملخص للجلسة الصغيرة بتاعتنا

مشاركا بذلك فى نشر الفكرة على مستوى السويس

كعضو مشارك معانا

و ليس كضيف

و دى اجمل حاجة سمعناها إمبارح


Post a Comment

كتب