Featured Post

ازاى تكتب رواية الجزء الثانى

Sunday, July 12, 2009

حمدي ..يتمنى أن يرتبط بفتاة تشبة جيهان السادات


قلم سنون: الحلقة العاشرة


محمد حمدي
صاحب مدونة دماغي
من زمان كان نفسي أعرف اية اللى فى دماغه
ساعات كتير بختلف مع أفكار كتير له
و ساعات بقتنع بأفكار بافكاره
هو بيحترم اختلافك معه
و عشان كدة تعالوا نقدم لكم حد ماشي بدماغه


دماغك فيها اية؟

فيها أفكار حاسس انها مختلفه عن افكار السواد الأعظم من الشباب اللى فى سنى .. أو حتى الأكبر من سنى

يمكن بسبب التعليم .. أنا فى مرحلة إبتدائى إتربيت فى مدرسة راهبات . الفرنسية كانت اللغة الأولى هناك .. إتعلمت هناك الفرنساوى وكيفية تقبل الأخرين مهما كانوا مختلفين معايا .. من هنا بدأت أنفتح على معرفة ثقافات وأديان جديده .. كان سنى صغير وكنت بتشرب المعلومات زى الأسفنج ما بيشرب الميه . لما كبرت عرفت إن ناس كتير إتربوا فى الفترة دى على عدم تقبل أى شىء إلا اللى هما اتربوا عليه . من هنا جه الاختلاف


طب لية مش عايز تعيش زي الناس؟

لما دخلت المرحلة الاعدادية حصل صدام بين اللى اتربيت عليه وبين اللى شفته فى المجتمع . ساعتها قررت أعيش زى الناس وأبطل أسأل (ليه , إزاى) .. بعد فترة أدركت إنى مستحيل هقدر أعيش كده .. وقررت أرجع تانى لدماغى والى يحصل يحصل

حصل صدام بين افكارى ومعتقدات الآخرين . وفشلت ألاقى حد يتفاهم مش يتخانق معايا. من هنا اتجهت للكتابه والنشر لدايرة أوسع من الناس اللى بقابلهم بشكل يومى عشان اعرف انا افكارى صح ولاغلط


حبيت يا محمد؟

حسيت بمشاعر إعجاب كتير , لكن علاقه حب حقيقية مدخلتهاش , يمكن لإن مسئولية كسر قلب إنسانه بنت ناس فى حالة فشل الحب بتخلينى مش عاوز ادخل علاقة حب إلا لو كنت متأكد من إنها الإنسانة اللى هعيش معاها اللى باقيلى من عمر


مين اجدع امرأة في مصر؟

أمى
ولو إنضاف على عمرى 3 أعمار كمان مش هرد 1% من اللى عملته معايا
وبتعمله
وهتعمله


غير امك مين الشخصيات العامة؟

أهم من الشخصيات العامة فيه أمهات فى أماكن تحت خط الفقر بتطلع ولاد أحسن منى ومنك ومن عشرة زينا .. هى دى أجدع ستات فى مصر
لكن لو عاوز إسم حد مشهور ممكن أقولك جيهان السادات


لية بقي جيهان و لية انت بتحب السادات عن ناصر؟

أنا بطلت عبادة أصنام من البشر .. بالتالى أنا مؤمن أن لكل رئيس حكم مصر مجموعة عيوب ومميزات . من وجهة نظرى (توليفة) عيوب ومميزات السادات هى أفضل توليفة للتلات حكام اللى حكمونا

ليه جيهان لإنها قدرت تقوم بدور فعال وحقيقى فى حياة رئيس الجمهورية بذكاء , بحيث متظهرش انها متسلطه وفى نفس الوقت متقعدش فى الضل
زمان كنت أبيض وإسود فى إختياراتى .. كنت بحب ناس بجنون وأكرة ناس بإفترا .. النهرده إتعلمت إن فى الحياة مساحات واسعة من تدرجات الألوان بين الأبيض والإسود


نفسك ترتبط بواحدة شبه جيهان السادات و توقف جنبك زي ما وقفت جنبه؟

نفسى أرتبط بإنسانة تكون جنبى وأكون جنبها لحد ما نكون عواجيز ومبقاش فينا أى شىء مادى يجذب الأخر


تفتكر ان مجتمعنا فى وسط الضغوط دى ممكن حاجة حلوة تحصل؟

ده فعلا بيحصل كل يوم .. وده سر الشعب المصرى الى بيطلع من عز الأزمة بحاجه كويسه ويقدر يتكيف مع كل الظروف الصعبه حوالية .. أظن ربنا لو دخل الشعب المصرى جهنم هيقدروا برضوا يتكيفوا معاها ويعيشو فيها

المصريين اخترعوا لغات حيه جديده زى الفرانكو اراب للموبايل
ولغة الرنات عشان معهمش رصيد


شايف مستقبل مصر ازاي؟

مستقبل مصر متقلب زى موج البحر .. واللى يقولك انه شايف اى حاجه يبقا كداب


خايف من المستقبل؟

لا خالص
انا خايف من التقلبات اللى هنشهدها وفى نفس الوقت مش مرتاح فى الوضع المستقر
مصر عامله زى الكتكوت اللى الحاوى كان بيخليه يرقص على الصفيح من خلال انه يسخن الصفيح تحت رجله .. الكتكوت هيجوع لو منطش ولو وقف هيتلسع


امتي تحس انك مضايق ؟

لما بلاقى موضوع حسمناه من الف سنه وحد لسه بيفتحه او يجادل فيه , ولما اشوف موقف المس فيه اد ايه لسه فى ناس عندها ازدواجية فى افعالها


ساعات بحس يا محمد انك بتحارب طواحين الهوا؟

أنا مش بحارب أصلا ! أنا بطلع الكلام اللى جوايا وخلاص .. لو صادف وحد اتغير بسببه - وده نادر - يبقا انا كسبت مكسب كبير .. ولو محدش اتغير يبقا انا برضو مستفيد ان طلعت اللى فى " دماغى


Post a Comment

كتب