Featured Post

ازاى تكتب رواية الجزء الثانى

Monday, June 15, 2009

بسمة عبد الباسط عايزة اية


قلم سنون: الحلقة التاسعة


بسمة عبد الباسط
مؤلفة كتاب البنات عايزة اية بمشاركة مع بدرية طة .. و مديرة تحرير مجلة على صوتك .. تتحدث معي فى أقرب الى فضفضة منه الي انه حوار صحفي عن مشاكلها و مشاكل التي تتعرض لها الكاتبات في بداية حياتها الثقافية ..


ازاي بتعيشي حياتك مع الملل؟

يعنى بصراحة بحاول أخرج نفسى منه بأى طريقة يعنى أخرج أتمشى أقعد على الكورنيش أشوف النيل وأشم هو ولأن منظر النيل بيريحنى جدا ولكن طبعا الملل ساعات بيكون مسيطر جامد وبحاول أشغل نفسى بحاجات كتيرة علشان أخرج من المود ده ولأنه لما بيطول بيسطير عليا جامد وبيبقى صعب أخرج منه وعلشان كده أول ما بحس بيه بحاول أطرده برة حياتى فورا


الواحد بعد ما يحقق اهدافه ممكن يحس بالملل؟

ده على أعتبار أنه حققها كلها ولكن الأنسان طول ما هو عايش بيكون عنده أهداف صغيرة بيعملها علشان توصله لأهداف وأكيد كل ما بيوصل لهدف بيتطلع للأحسن ويمكن يوم ما بيوصل لكل حاجة وما بيلاقيش حاجة جديدة عنده أكيد هيحس بملل لأنه كان شاغل نفسه بحاجات كتيرة وفجأة مابقاش عنده أى حاجة ولكن عن نفسى يمكن ما وصلتش للأحساس ده وبتمنى ما أوصلش ليه لأن لسة عندى آحلام كتيرة جدا عايزة أحققها


و اية احلامك دلوقتي حالا؟؟اية التغير اللي حصل فى حياتك بعد البنات عايزة اية؟

آحلامى دلوقتى أنى أكمل مشوارى فى الكتابة اللى طول عمرى كنت بحبها و بدأت أقف على أول الطريق وبقيت بكتب فى كذا مكان ولكنى لسة بتطلع للأحسن والأفضل وبالنسبة للكتاب بتمنى ينجح ويوصل لكل الناس وكمان بتمنى ربنا يوفقنى أنا وبدرية ونعمل الجزء الثانى منه ويحقق النجاح التغيير اللى حصل فى حياتى

بصراحة أنا جوايا صراع نفسى رهيب أنا عن نفسى زى ما أنا البنوتة اللى عندها آحلام وطموح وعايزة تحققه واللى بتحب كل الناس والحياه وبتحب تكون علاقات كتيرة وبتحب البساطة فى التعامل مع كل الناس ولكن بعد موضوع الكتاب وبعد ما بقيت معروفة مش هقول قوى

ولكن الى حد ما ما بقتش عارفة أطلع اللى جوايا زى الأول مش عارفة أعيش فى دور الكاتبة اللى عايشة فى برج عالى ولازم تعمل حدود وفواصل بين الناس مش قادرة أفصل بسمه البنت العادية عن بسمه الكاتبة لأنهم فى النهاية واحد وكتير قوى ببقى عايزة أدخل مدونتى أو على الفيس بوك
وأكتب حاجة مضيقانى أو مزعلانى ولكنى بقيت بخاف قوى
من رد فعل الناس ولأن للأسف الناس بتتعامل مع الكاتب على أنه أنسان لازم يفضل على طول
فى شكل ومكانة معينة وما يبينش أى مشاعر غضب أو حزن أو يحاول يطلع اللى جواه وكتير بقدر أسيطر على مشاعرى وأنا مضايقة وأنا ما أكتبش اللى جوايا ولكن ساعات بتكون الضغوط أكبر منى وما بقدرش أسيطر على نفسى


اية احلامك الجاية؟

آحلامى الجاية هيا نفس آحلامى وطموحى فى الكتابة وبخصوص كتابى وأنى أكمل في المشوار ده وصوتى يوصل لكل الناس

آحلامى الخاصة زيى زى أى بنت نفسى الاقى اللى يشاركنى باقى حياتى ويفهمنى كويس ويقف معايا ويشجعنى وأهم شىء أنه يفهمنى أنا كويس لأنه لو فهمنى وعرف بسمه كويس هيقدر يتعامل معايا كويس ويمكن أنا بقول كده لأنى بطبعى شخصية حساسة قوى وفى نفس الوقت عصبية ولكن الناس اللى حواليا زى أهلى وأصحابى واللى فاهمنى كويس قوووووى بيعرفوا أزاى يمتصوا غضبى بسهولة وعمرهم ما بيشوفونى عصبية وبيعرفوا كمان أزاى يتعاملوا مع حساسيتى

ولأن فيه ناس لما بتسمعنى بقول كده عن نفسى بيفتكرونى شخصية صعب التعامل معاها
ولكن الناس اللى بتفهمنى كويس قوى والناس الغالية عندى قوى عمرهم ما بيشوفوا عصبيتى دى ولا بتعامل معاهم بنفس الحساسية ويمكن على قد ما بزعل من كلمة بسيطة ممكن كلمة أبسط منها تسعدنى جدا وعلى فكرة أنا مش عايزة أتجوز لمجرد
أنى أشيل كلمة آنسة وأحط كلمة متزوجة علشان المجتمع والناس عايزين كده لا أنا عايزة
حد يفهمنى يعرفنى كويس ويبقى عايز بسمه لشخصيتها وفكرها وكل حاجة فيها وأهم حاجة أنه ما يقفش فى طريقى ويقف معايا ولأنى عمرى ما هسمح لشغلى ولا طموحى يجى على حساب أى أنسان أرتبط بيه ولو حكمت ممكن أسيب شغلى بس المهم
هو مين اللى يستاهل ده وساعتها هبيع الدنيا علشانه وكمان نفسى فى حاجة مهمة قوى أنى أقدر أرضى أمى وأسعدها قوووووووووووووى لأنها تعبت علشانى قوى وواقفة جمبى فى آحلامى وطموحى وشغلى

وفعلا مش عارفة أرد ليها كل اللى عملته أزاى
وعلى فكرة مفيش أى بنت ولا أى شاب مش نفسهم يلاقوا نصهم التانى ويكملوا حياتهم معاه ولكن الأيام دى بلاقى أتهامات كتيرة للبنات أنها بترفض العرسان وأنها بتتبتر على النعمة ولكنى عايزة أقول حاجة مهمة البنات مش بيرفضوا لأنهم بيدلعوا ولا عايزين واحد بمواصفات خرافية هما عايزين راجل يتقى ربنا فيهم ويفهمهم ويفهم شخصيتهم وفكرهم ويعجب بيها قبل ما يعجب بشكلها ويتغاضى عن كل حاجة


لية اغلب كتابات البنات فى موضوعات خاصة بالرجل ..كتابك و كتب اغلب البنات؟

بكل صراحة هيا الحياه دى مش مكونة من راجل وست من بنت وشاب وأحنا من يوم ما بنتولد بنلاقى الحياه كده راجل وست متجوزين ومعاهم أطفال والأطفال من أول ما بتولدوا بالفطرة كده بتلاقى البنت منجذبه لوالدها والولد لأمه
ودى بتبقى طبيعة بشرية وأول ما بيكبروا بتبدأ تتكون مشاعرهم دى وكل واحد وواحدة نفسه يلاقى نصه التانى علشان يكمل معاه حياته ويعمل بيت وأسرة ولكن طبعا ولأننا فى مجتمع شرقى

فدايما النظرة للبنت بتكون أنها أقل من الولد فى كل حاجة وبيكون التقليل منها عند ناس كتيرة وخصوصا فى العلاقة بين الخطيبين أو الزوجين دايما بنلاقى الراجل لما بيبقى خطيب أو زوج بيحاول بكل الطرق
يثبت نفسه على الطرف الثانى بأى طريقة وللأسف فيه رجالة كتيرة مش فاهمين طبيعة الستات ولا هما عايزين إيه وفيه أساسيات فى التعامل غايبة عنهم قوووووووى ولو عرفوها أعتقد مشاكل كتيرة هتختفى
ولأن كمان البنت فى مجتمعنا من أول ما بتبدأ تدخل الجامعة والكل بيتطوع ويتدخل فى حياتها وعايز يجوزها
والناس كلها بتحسسها بأن حياتها هتدمر لو مالحقتش نفسها وأتجوزت
وكتير الضغط ده بيخليها تقبل أى حد علشان تريح دماغها
وعلشان نظرة المجتمع دى وعلشان كمان رجالة وشباب كتير ومش كلهم طبعا علشان ما أكونش ظالمة ولكن نسبة كبيرة مش فاهمين أزاى يتعاملوا مع الطرف التانى وعلشان كده معظم كتابات البنات عن الرجالة

بس بالنسبة لكتاب البنات عايزة إيه الكتاب مش عن الرجالة بس ومش موجه ليهم بس ده لكل المجتمع بما فيهم الستات كمان يعنى الكتاب شامل كل المجتمع

Post a Comment

كتب