Featured Post

ازاى تكتب رواية الجزء الثانى

Monday, April 6, 2009

شيماء الجمال : بهرب من الواقع و المجتمع


قلم سنون: الحلقة الرابعة


شيماء الجمال .. صحفية .. شابة .. مصرية .. أم .. دماغ ..حالة .. مهتمة بالثقافة .... تكتب في كلمتنا و اليوم السابع و غيرها من المجلات و الصحف العادية و الالكترونية .. كما أن مقالاتها تنقلها مواقع الانترنت ..
عاشت سنوات عمرها بين عدد من الدول و مع عدد من الجنسيات ..
تعتبر من شخصيات المميزة .. بداخلها تمرد خفي سوف نلاحظه في كلامها .. و ذكاء في اختيار الألفاظ


لية دايما بتحاولي تعيشي في عالم افتراضي ؟؟ ده هروب من الواقع ولا محاولة تأقلم؟؟

لأ هروب من الواقع و المجتمع ..المجتمع اللي بيقول ان الواحدة طالما اتجوزت وخلفت يبقى خلاص المفروض تقعد في البيت و تنسى انها شابة..ما ينفعش تروح كافيهات ولا تنزل تشوف اصحابها ..ولو قالت لواحد صباح الخير تبقى انسانة مش تمام..عشان كدة انا عملت اطار لحياتي وماشية فيه بعيد عن اي حد تاني


بتجمعي بين المتناقضات الاستقراطية و الشعبية ؟؟

انا مش بتعمد اني اظهر بالشكل ده بس هي دي حياتي !! انا الشغل مع أجانب و هاي و هالو ،و في الأجازة ع القهوة وصباح الفل ..حياتي نفسها فيها متناقضات
أنا أصلاً من شبرا و بحب البلد و النزول و آكل سندوتشات الكبدة و أشرب سوبيا من أم كيس ..وف نفس الوقت بحب سيلنترو و بيتزا بابا جونز و الأوبرا..يعني بحب ده وده وبعمل دهو ده يمكن الغربة خلتني احب تفاصيل البلد
اتحرمت من البلد دي تقريبا كل طفولتي و معظم مراهقتي


شايفة المصريين ازاي .. ناقصهم اية عشان يبقوا كويسين؟؟

ناقصهم انهم يقدروا قيمة البلد دي ، ويعرفوا يستمتعوا بحياتهم في بلدهم..ناقصهم يتعلموا يتقبلوا الناس زي ما هي من غير ما يقعدوا يكونوا آراء بناء على نظرة سطحية او على كلام الناس
الحياة بسيطة ومش مكلكعة ..نفسي الناس تشوفها كدة


حاسة ان فيه مشكلة فى التعامل مع الناس العادية اللى خارج الوسط الثقافي ؟؟ يعني مثلاكنت بعمل حوار ..الصحفية قالت لي .. الناس بتقول المدونين ناس فاضية ؟؟

بص ..هو معنديش مشكلة صريحة في التعامل مع الناس اللي خارج الوسط الثقافي ..لكن بحس نفسي مش عارفة اندمج معاهم ومش مصدقاهم ،لما بقول لواحد ة صحبتي مثلاً تعالي ننزل الساقية و تقولي ساقية ايه؟ .. ببقى هتشل !! في حد ما يعرفش الساقية !! و أقولهم تعالوا عزماكوا على حتة حفلة ،يقولولي لاااااااا احنا طالعين دريم بارك ! فاهمني ..ازاي بقى اعرف اتواصل معاهم ؟
و طبعاً بقابل ناس كتير مش عارفين يعني ايع مدونة و بقعد اشرحلهم يعني ايه مدونة !

Post a Comment

كتب